Emmanuelle Braza

alitit – tunog ng kawayan pagsayaw sa hangin

dagalak – tunog na likha ng apoy 

daginding – ugong | ingay ng madla | tunog ng kulog

daguldol – ingay na likha ng makina kung maluluwag ang mga piyesa

dagundong – ugong o tunog na napakalakas, gaya ng kulog

dagusdos – tunog ng pagkaladkad

daguydoy – daloy ng tubig na marahan

hagunghong – tunog ng rumaragasang tubig | tunog o alingawngaw ng bagsak o daloy ng tubig sa kuweba o tunnel 

hagutak – tunog ng paglalakad sa putik | tunog ng bagay na binunot sa putik o sa botang basa

haguthot – tunog ng pagsipsip ng hangin o likido sa bibig

huni – tunog na nagagawa ng ibon o iba pang hayop

kabo – ingay na dulot ng pagtayo ng mga tao

kagalkal – ingit ng mga hugpungang mekanikal na maluwag ang pagkakakabit

kagangkang – ugong o ingay na walang katuturan

kagaskas – ingay na likha ng buhanging tinatapakan

kagilkil – mahina at impit na tunog gaya ng tunog ng kililing

kagingking – banayad na pag-awit

kagiskis – tunog ng dalawang metal na nagkikiskisan

kagorkor – tunog na nalilikha sa pagkayod ng niyog

kagoskos – tunog ng kamot

kagugkog – tunog ng kulog | tunog ng putok 

kagudkod – tunog ng kulog o anumang pagsabog na nasa malayo

kagungkong – tunog ng metal na sisidlang kinakaladkad 

kalabog – tunog ng pagbagsak ng anumang mabigat na bagay

kalabukab – dumadagundong na tunog tulad ng ingay ng tambol

kalabusab – ingay ng isdang tumalon sa tubig

kalabusaw – tunog ng nilabusaw na tubig

kalairit – matinis na tunog, gaya ng langingit ng pinto kapag sinasara o binubuksan

kalampag – malakas na ingay

kalansag – tunog o ingay na dulot ng ginagamit na plato o anuman

kalansing – matinis na tunog na nalilikha ng metal, lalo na ng salaping barya

kalansog – tunog ng metal na tumatama sa isa pang metal

kalantis – ingay o tunog na mahina ngunit matalim | tunog ng paghaginit ng isang bagay 

kalantog – kalampag | garalgal

kalantong – ingay ng taong sobrang nagsasalita

kalapsaw – tunog at galaw ng malaking alon

kalaskas – tunog ng espadang binubunot mula sa kaluban nito | tunog ng metal na ikinikiskis sa kapwa metal

kalating – mahina at tumataginting na tunog

kalatis – lagitik | lagutok | palatak

kalatog – tunog na likha ng pagkatok sa kahoy o paglapag ng plato sa mesa

kalawakaw – tunog ng hungkag na tiyan

kalugkog – kalantog | kalampag | kaluskos | dagundong

kaluskos – tunog ng mahinang kamot o galmos

kambog – tunog ng mabigat na bagay na tumama sa ibabaw ng tubig

kansog – tunog ng tubig o likido na inaalog sa loob ng lalagyanan nito

karag – tunog ng pagpadyak sa sahig

kasag – ingay ng mabibigat na pagtapak ng mga paa

kaslog – kumukulong tunog ng bituka

kayugkog – kalugkog 

kisaw – tunog ng likido sa loob ng sisidlan habang ibinubuhos o inaalog 

kugkog – alingawngaw ng tunog sa tubig | tunog mula sa paggamit ng mga instrumentong yari sa kawayan

lagaslas – malakas na tunog ng tubig na bumabagsak mula sa mataas na pook gaya ng balon | ingay ng dahong gumagalaw sa hihip ng hangin

laginit – hagkis | tunog ng nabali o nabiyak na kahoy

lagitik – tunog mula sa isang bagay na pinipihit, nababali, o napuputol

lagitlit – tunog na higit na mataas sa lagitik | pagispis

lagumok – ingay na likha ng mga hayop habang sinisira ang bukid na nalinang na o may mga pananim

lagunlon – pulutong at ingay ng mga tao na nagtatakbuhan palayo sa kinatatakutan

lagunlong – tunog ng tagatak ng isang talon

lagunos – lagaslas

lagusaw – tunog sa tubig na likha ng pagpasag ng mga isda o ng pagtatampisaw

laguslos – ingay na likha ng tubig mula sa mga puno, o mula sa prutas, o ingay ng pagpatak ng ihi

lagutok – maikli ngunit buong tunog ng butong binabaltak o inuunat, o ng tabla o kahoy na humaginit, o ng apoy kapag sinusunog nito ang bagay na hungkag

lagyak – tunog ng mga bagay na isinasalin sa sisidlan o bumabagsak sa kulob na pook, gaya ng mga butil na isinasalin sa palayok o batong inihulog sa balon

langasngas – tunog ng nagtatagis na ngipin

langitngit – impit na tunog na gawa ng pagkikiskisan o paglalapat ng dalawang bagay

langutngot – tunog ng nginunguyang bagay na malutong | tunog ng nagtatagis na ngipin kung natututlog

lanog – tinig na mababa, magaralgal, at waring paos

lawiswis – pagaspas ng mga dahon ng kawayan kapag malakas ang ihip ng hangin

ngayabngab – ingay sa bibig kapag kumakain ng bagay na matigas

pagukpok – tunog ng mga katok o palo mula sa malayo

tagiktik – tunog katulad ng palo ng latigo | banayad ngunit matalim na tunog ng sunod-sunod na patak

taginting – tunog na nalilikha ng nagpipingkiang metal| tinig na matarling

tagistis – tunog ng dahon ng niyog na napupunit o kaya ng damit

tagiswak – tunog ng biglang pagpunit ng tela

tagungtong – tunog ng pagtatalop sa balat ng palay

taguntong – matinis o matalim na metalikong tunog

taguot – tunog o ingay na likha ng along humahampas sa batuhan 

tagupak – tunog ng biglang pagbagsak ng sapad na bagay sa matigas at sapad na rabaw

takatak – tunogng patak ng ulan sa lata o bubungang yero | tunog ng tinitipang makinilya

taklab – tunog ng biglang pagsara ng bintana o pinto

ugong – malakas at mahabang tunog, gaya ng tunog ng hangin, dagat at katulad